MTWARA: November 7, 2026 - Benki ya NMB imewakutanisha wadau mbalimbali wa sekta ya korosho mkoani Mtwara katika kikao kilicholenga kujadili fursa za ufadhili na kutafuta suluhisho la changamoto zinazokabili mnyororo wa thamani wa zao hilo, huku Bodi ya Korosho Tanzania (CBT) ikiwahakikishia wawekezaji upatikanaji wa malighafi za kutosha kwa ajili ya viwanda vya kubangua korosho.
Mkurugenzi Mkuu wa CBT, Francis Alfred, amesema bodi hiyo itahakikisha wawekezaji wanaowekeza mitaji mikubwa katika ujenzi wa viwanda vya kubangua korosho hawakabiliwi na changamoto ya kukosa korosho ghafi za kuendesha shughuli zao.
Alfred alitoa kauli hiyo Novemba 7, 2026, mkoani Mtwara, wakati wa kikao cha wadau wa korosho kilichoandaliwa na NMB, kikihusisha wabanguaji, wanunuzi na wafanyabiashara wa zao hilo.
Amesema dhamira ya kuhakikisha upatikanaji wa malighafi inakwenda sambamba na juhudi za Serikali za kuongeza uwezo wa viwanda vya kubangua korosho nchini ifikapo mwaka 2030.
NMB Yapongezwa kwa kuwaunganisha wadau
Alfred amepongeza hatua ya NMB ya kuwakutanisha wadau wa sekta hiyo, akieleza kuwa ushirikiano kati ya taasisi za fedha na wafanyabiashara wa korosho ni muhimu katika kuongeza uzalishaji na kuimarisha shughuli za biashara katika mnyororo mzima wa thamani wa zao hilo.
Aidha, amezihimiza taasisi nyingine za fedha kuwa karibu na wadau wa sekta ya korosho ili kuelewa mahitaji yao na kubuni masuluhisho ya kifedha yatakayochochea ukuaji wa biashara.
Pia amezitaka benki kuhakikisha wakulima wanalipwa kwa wakati ili kuwawezesha kukidhi mahitaji yao ya kifedha na kujiandaa kwa shughuli zinazofuata za uzalishaji.
NMB Yajipanga Kusaidia Biashara za Korosho Msimu wa 2026/2027
Kwa upande wake, Mkuu wa Idara ya Biashara ya Kilimo kwa Wateja Wakubwa wa NMB, Christopher Mwalugenge, amesema benki hiyo imejipanga kutoa huduma mbalimbali za kifedha kusaidia biashara za korosho katika msimu wa 2026/2027.
Amesema masuluhisho hayo yanalenga kuwawezesha wanunuzi wa korosho wanaoshiriki katika minada na masoko ya awali kupata mitaji ya kutosha ili kununua mazao kwa wakati na kwa kiwango kinachohitajika.
Vilevile, amesema NMB imeweka mazingira ya kuwawezesha wabanguaji kupata fedha za kununua korosho ghafi kwa ajili ya kuendesha viwanda vyao na kuongeza uzalishaji wa korosho zilizobanguliwa nchini.
Katika hatua nyingine, Mwalugenge amesema benki hiyo inatoa masuluhisho ya kifedha yanayokidhi mahitaji ya wasafirishaji wa korosho nje ya nchi, ikiwa ni pamoja na kuwawezesha kufanya manunuzi kwa wakati na kutekeleza mikataba yao ya biashara katika masoko ya kimataifa.
Ameongeza kuwa NMB imeimarisha pia huduma za malipo na miamala ili kurahisisha shughuli za biashara katika hatua mbalimbali za mnyororo wa thamani wa korosho.
Kuimarisha Ushirikiano Katika Sekta ya Korosho
Kikao hicho cha wadau kinatarajiwa kuimarisha ushirikiano kati ya taasisi za fedha na wadau wa sekta ya korosho, hususan katika kuongeza upatikanaji wa mitaji, kuchochea uwekezaji katika viwanda vya kubangua korosho nchini na kuhakikisha wakulima wanapata malipo kwa wakati.
Kupitia ushirikiano huo, upatikanaji wa fedha kwa wanunuzi, wabanguaji na wasafirishaji unatarajiwa kusaidia kuongeza ufanisi wa biashara ya korosho na kuchangia katika kukuza thamani ya zao hilo ndani ya nchi.
Hatua hiyo pia inaunga mkono azma ya kupanua uwezo wa Tanzania wa kubangua korosho ndani ya nchi ifikapo mwaka 2030, hatua inayolenga kuimarisha mnyororo wa thamani wa zao hilo na kuongeza manufaa ya kiuchumi kwa wadau wake.
No comments:
Post a Comment