WANANCHI KUNUFAIKA NA MIRADI YA KIMKAKATI MWENGE

 

* DC Gondwe aeleza azma ya kuipeleka kasi miradi inayoiingizia Manispaa mapato

MKUU wa Wilaya ya Kinondoni Godwin Gondwe amesema katika kipindi hiki cha mwaka mmoja wa Rais Samia Suluhu Hassan miradi yote inayoiingizia fedha Manispaa hiyo itapelekwa kasi ili wananchi waweze kunufaika na juhudi za Serikali na viongozi katika kuleta maendeleo.

Akizungumza wakati wa kukabidhi mradi wa ujenzi wa uwanja wa mpira maalum kwa Manispaa hiyo unaojengwa Mwenge jijini Dar es Salaam kwa mkandarasi ambaye ni Jeshi la Wananchi Tanzania (JWTZ) Gondwe amesema, mradi huo utawanufaisha wakazi wa maeneo jirani kupitia vitega uchumi vilivyo ndani ya uwanja huo.

Gondwe amesema maeneo ya kimkakati ya kupaisha Manispaa hiyo ni pamoja na mradi wa kituo cha mabasi Mwenge na uwanja wa mpira ambao Manispaa hiyo ina timu ya mpira ya KMC ambayo inafanya vizuri katika Ligi kuu ya NBC na kupitia uwanja huo wa nyumbani wakazi wa jirani watanufaika kupitia maduka na vitega uchumi vilivyopo katika uwanja huo.

Kuhusiana na ujenzi wa kituo cha mabasi Mwenge mradi wenye thamani ya shilingi Bilioni 7 Gondwe ameeleza, kuna mpango kabambe wa kuwapanga wamachinga katika eneo hilo lenye maduka yapatayo 146 ili waweze kufanya shughuli zao za kiuchumi na kijiingizia kipato.

''Niwaombe majirani zetu wa hapa panapojengwa kiwanja cha mpira waendelee kumpa mkandarasi ushirikiano ili kazi ikamilike kwa wakati na tuanze kuingiza mapato katika Manispaa yetu.'' Amesema.

Amesema JWTZ watafanya kazi hiyo usiku na mchana katika kuhakikisha mradi huo unakamilika ndani ya muda uliopangwa na hiyo ni pamoja na kuhakikisha miradi yote inayoiingizia fedha Manispaa hiyo inakamilika kwa wakati.

Awali Mstahiki Meya wa Manispaa ya Kinondoni Songoro Mnyonge amesema ujenzi wa uwanja wa mpira maalum kwa Manispaa hiyo uliopo Mwenge utakamilika ndani ya miezi sita ijayo na tayari kampuni ya Azam Media imeahidi kufunga taa zitakazowezesha mechi za usiku bure ikiwa watamaliza ujenzi huo ndani ya muda wa miezi sita.

Songoro amesema, kituo cha mabasi Mwenge kitakabidhiwa kwa mkandarasi mwingine kwa hatua za umaliziaji na kinategemewa kukamilika ndani ya siku kumi.

''Miradi ya maendeleo kinondoni ni mingi na tunaenda na kasi ya Mh. Rais katika kuhakikisha wananchi wanafikiwa na huduma zote muhimu, tutaendelea kushirikiana na jeshi katika miradi mingine itakayopatikana hivi karibuni ili iweze kutekelezwa kwa kasi.'' Amesema.

Kwa upande wake Mkurugenzi wa Manispaa ya Kinondoni Bi. Khanifa Suleiman amesema kuwa miradi hiyo miwili inatekelezwa kwa fedha zitokanazo na mapato ya ndani na imelenga kuinua kipato cha wananchi kupitia maduka 70 yaliyopo katika uwanja huo pamoja na maduka 146 yaliyopo katika kituo cha mabasi Mwenge ambapo wafanyabiashara wadogo maarufu kama wamachinga watapangwa kwa utaratibu maalumu na kufanya shughuli zao za kujiongezea kipato.

Bi. Khanifa amesema Manispaa ina fedha za kutosha za kukamilisha miradi hiyo ambayo imelenga kuwanufaisha watanzania na tayari JWTZ wapo kazini katika kukamilisha miradi hiyo.

Akieleza kuhusu utekelezaji wa mradi huo mkandarasi anayesimamia mradi huo Mkuu wa Kikosi 361 Kanali David Luoga amesema mradi huo una thamani ya shilingi bilioni 1 na milioni 200 na utakamilika kwa wakati ikiwa pande mbili zitashirikiana katika kuleta maendeleo hayo.

Mkuu wa Wilaya ya Kinondoni Godwin Gondwe akizungumza na wanahabari kuhusiana na miradi miwili ya kimkakati inayotekelezwa Mwenge jijini Dar es Salaam na kueleza kuwa wataenda na kasi ya Serikali ya awamu ya sita katika kuwaletea wananchi maendeleo.

Msimamizi wa mradi wa uwanja wa mpira wa Mwenge Kanali David Luoga akizungumza na wanahabari kuhusiana na mradi huo na kueleza kuwa watashirikiana na Manispaa hiyo katika kuhakikisha unakamilika kwa muda uliopangwa.

Mstahiki Meya wa Manispaa ya Kinondoni Songoro Myonge (katikati,) akizungumza na Mkuu wa Wilaya ya Kinondoni Godwin Gondwe (kulia,) na Mkurugenzi wa Manispaa ya Kinondoni Bi. Khanifa Suleiman (Kushoto.)

Mkuu wa Wilaya ya Kinondoni Godwin Gondwe (Kushoto) akiteta jambo na Mstahiki Meya wa Manispaa ya Kinondoni Songoro Mnyonge na mkandarasi wa mradi huo Kanali David Luoga (katikati) Mkuu wa Kikosi 361.

Muonekano wa uwanja.