KATIKA kuhakikisha wanaongeza hamasa ya timu kuelekea mechi ya pili ya hatua ya makundi ya Kombe la Shirikisho Afrika, mabosi wa Yanga walivamia mazoezi ya timu hiyo na kumwaga noti kwa wachezaji.
Yanga keshokutwa Jumatano inatarajiwa kuwakaribisha wapinzani wao Rayon Sports ya Rwandakatika mchezo huo wa makundi utakaopigwa kwenye Uwanja wa Taifa jijini Dar es Salaam.
Yanga tayari imepoteza mchezo wa kwanza katika kundi lao kwa kufungwa na USM Alger ya Algeriakwa kufungwa ugenini mabao 4-0.
Kwa mujibu wa taarifa ambazo imezipata Championi Jumatatu, mabosi hao walifika katika mazoezi ya timu hiyo yaliyofanyika juzi kwenye Uwanja wa Chuo cha Polisi, Kurasini jijini Dar es Salaam yakiongozwa na Mkongoman, Zahera Mwinyi.
Mtoa taarifa huyo alisema mara baada ya kufika mazoezini, mabosi hao walionekana kufuatilia kwa makini na baada ya kumalizika walipata nafasi ya kuzungumza na viongozi, benchi na kikubwa kuwapa hamasa ya mchezo ujao dhidi ya Rayon na badaye kila mchezaji na kiongozi wa benchi la ufundi alipewa shilingi 50,000.
“Leo tulipata ugenini wa ghafla wa viongozi kutoka kamati ya mashindano wakiongozwa na mwenyekiti wake Nyika (Hussein), Lukumayi (Samuel) na kiongozi mmoja jina lake siri ambaye yeye ndiye aliyetoa fedha hizo.
“Fedha hizo zilitolewa baada ya mazoezi kumalizika na viongozi hao kuzungumza machache, kikubwa wamesisitiza umuhimu wa mechi licha ya timu kukabiliwa na matatizo ya kifedha,” alisema mtoa taarifa huyo.
Aidha, Championi Jumatatu lilimtafuta kocha Zahera kuzungumzia hilo, akasema: “Ninafurahi kuona hamasa kubwa ikitolewa kwa wachezaji wangu katika kuelekea mechi na Rayon.
“Kama nilivyokwambia awali, bado baadhi ya wachezaji wameonekana kuweka mgomo kutokana na madai yao ya mishahara, lakini nafarijika kuwaona wengine wakifika mazoezini.”
Wilbert Molandi, Dar es Salaam.
No comments:
Post a Comment