Mwenyekiti wa Jumuia ya Wazazi Tanzania ataka wazazi wa Panya Road nao kukamatwa

NA MWANDISHI WETU

JUMUIYA ya  Wazazi  Tanzania  ya Chama Cha Mapinduzi (CCM) , imekemea vikali vijana wanaojihusisha na vitendo vya uhalifu wanaojiita Panya Road na kuzitaka mamlaka kuchukua hatua kali dhidi yao.

Akizungumza na wandishi wa habari, Dar es Salaam, leo, Mwenyekiti wa Jumuiya hiyo , Dk. Edmund Mdondwa, amesema  kuibuka kwa  wahalifu hao kunachangiwa na mmomonyoko wa maadili katika jamii  hasa  wazazi kushindwa kusimamia vema malezi.

Dk. Mndolwa amesema,  ugumu wa maisha siyo kigezo  cha  wahalifu hao  kujiingiza katika vitendo hivyo kwani  kama shida yao ingekuwa ni kuiba mali wasingekuwa wanaua watu wasio na hatia.

Ameeleza  ili  kukomesha  vitendo hivyo   hasa kwa watoto waliochini ya umri wa miaka 18 ni vyema hatua kali  zikachukuliwa kwa mhalifu na mzazi wake.

“Kama mhalifu analala ndani na  wazazi wake  lakini usiku anamka kwenda kuua watu na kurudi  basi ni lazima yeye na mzazi wake wawajibishwe,”amesemaa Dk. Mndolwa.

Pia ameshauri  Bunge la Jamhuru ya Muungano wa Tanzania kuangalia mabadiliko ya sheria itakayo wabana wahalifu wenye  umri wa chini ya miaka 18 wanaojihusisha katika uhalifu huo.

“Jambo la kusikitisha  Panya Road wengi wana  umri wa  chini ya miaka 18 hivyo    watahukumiwa kwa sheria za watoto. Kuna umuhimu wa kubadili sheria hizi kwa  kuwafunga wahalifu wanaojihusisha na matukio hayo ya kuua watu,”ameeleza sha Dk. Mndolwa.

Amebainisha   kama  wahalifu hao watahukumiwa hata kwa sheria za watoto basi wafungwe katika  magereza maalumu  za watoto .

Dk. Mndolwa amesema   ili kukabiliana na  matukio kama hayo ni vyema serikali kuchukua hatua   hasa kupitia Wizara ya Elimu, Sayansi na Teknolojia kwa kufanya marekebisho ya mitaala ya elimu ili elimu inayotolewe  imsaidie mtoto kujiajiri.

“Pia somo la  dini lirejeshwe shuleni na elimu ya  maadili, utamaduni, uzalendo   na wazazi wawe chachu ya kuwapa malezi bora watoto wao hali itakayo punguza kasi ya vijana kujiingiza katika matukio hayo ya kihalifu,”amesema.

Hivi karibuni vitendo vya kihalifu  vimeibuka katika maeneo mbalimbali ya jiji la Dar es Salaam, vinavyodaiwa kutekelezwa na kundi la Panya Road na kusababisha hofu kwa wananchi.