Kocha Ngorongoro Heroes awajibu wanaomkosoa

Kocha mkuu wa timu ya Taifa ya vijana chini ya miaka 20, Ammy Ninje, amesema hajali kuhusu watu wanaokosoa  mbinu zake za ufundishaji kwasababu hawezi kufanya jambo ili kumfurahisha kila mtu.

Kocha huyo amesema hayo leo Mei 11, 2018 wakati akiongea na vyombo vya habari kuelezea mchezo wa kufuzu mashindano ya kombe la mataifa Afrika chini ya miaka 20 kati ya timu ya Tanzania dhidi ya Mali na kuongeza kuwa kauli za kumpinga au kumpongeza haziwezi kumnyima usingizi.

“Mimi katika maisha yangu sihitaji kujulikana, kwahiyo mtu anikubali au asinikubali hiyo haina maana yoyote  kwangu hayo ndiyo maisha yangu, mimi ninachofanya ni kuwasaidia hawa vijana waendelee katika maisha yao ya mpira, kwahiyo watakao nisapoti au wasionisapoti hawezi kunifanya nisilale usiku” alisema Ninje.

Akiongelea mchezo huo Ninje  amesema timu yake imejiandaa kushinda mchezo huo na kuongeza kwamba timu  itatumia mfumo wa kushambulia zaidi ingawa itabidi waweke nidhamu ya ulinzi ili kutoruhusu goli

Mei 13, 2018, timu ya Tanzania itacheza mchezo dhidi ya Mali katika Uwanja wa Taifa, Dar es salaam katika mchezo wa kufuzu mashindano ya kombe la mataifa Afrika chini ya miaka 20 yatakayofanyika nchini Niger February 24, 2019.